एक मिनेट

तिम्रो लागि ‘एक मिनेट’
क्षणभरमै बितिजाने
बस्, एउटा नाथे समय न हो ।
मेरा लागि उही ‘एक मिनेट’
आशाहरुको मसिनो त्यान्द्रोमा अडिएको
पुरापुर एक जिन्दगी हो ।

राजनीति

राजनीति
फोहोरी खेल हुँदै होइन !
यो त केहीथान शासकहरुले
जबर्जस्त सृजना गर्न खोजेको
कथित भ्रम मात्रै हो।

मृत्यु कुरिरहेका मान्छेहरु

तिमीलाई लाग्दो हो-
हामी संयोगले मरिरहेका हौँ।
सत्य यो हो कि –
हामी त संयोगले बाँचिरहेका छौँ।
हामी त फगत मृत्यु कुरिरहेका छौँ।

मार्कसिट र ताराहरु

प्रिय !
तिम्रा सपनाहरुको बफादारीमा
मैले कुनै दिन आकाश रित्याईदिनेछु
र सजाउनेछु मेरा मार्कसिटहरुमा ।
म सोचिरहेछु-
कति ताराहरु टाँसेपछि
मेरो बबुरो मार्कसिट
प्रेमको प्रमाण बन्ला?

मिस नेपाल र पुँजीवाद

गजब लाग्छ ,
यो चरम पुँजीवादी महंगीमा
शरीर चैँ कति सस्तो हगि?
ए पुँजीवाद!
सुन्दरताको जति सुकै सुन्दर परिभाषा बनाउ
त्यो त्यति नै कुरुप हुन्छ ।

भ्रम

र प्रिय,
आज तिम्रै सामुन्ने म
मुर्दा शरिर लिएर
मुटु फिर्ता माग्न आएको छु
सम्बनधलाई पुर्णविराम लगाएर
गल्ती सच्याउन आएको छु।
आँफैलाई ब्रेक गरेर
ब्रेकअप माग्न आएको छु ।

प्रेमिल झुठहरु

सहरमा
झुठहरुको खरिदबिक्री तीब्र छ !

जस्तो कि,
हिजो भर्खर केहीथान झुठ बोलेर
मैले तिमीलाई आफ्नो बनाएको छु।

आकाश थामेका हुटिट्याउँहरु

पहाडजस्तो विचारलाई
उँटजस्तो कुरुप बनाउने
कमिलाजस्ता मान्छेहरु जोगाउन
आकाश थामेजस्तो गरिरहेका छौँ
हुटिट्याउँ जस्ता हामीहरु !

आँखाले किन प्रेम गर्छ?

बैँस ‘ओभरलोडेड’ ओठ
प्रेम छल्किइरहने आँखा
डिम्पल बसाईदिने गाला
छैन केही उ सँग
तैपनि उ
मेरी “मिस वर्ल्ड” हो
किनकि
म उसलाई प्रेम गर्छु !

चिसो राज्य

राज्य चिसो छ !

आँफुलाई न्यानो बनाउन
हरेक जाडोमा उ आगो झोस्छ
गरिबका झुपडीहरुमा !